منقبت مخدوم اشرف سمنانی جس کے پڑھنے کے بع حضرت مخدوم، اشرف سمنانی کی شان کا اندازہ ہوگا اور اس سے معلوم ہوگا کہ حضرت سمنانی نے کیا کیا کارنامے انجام دیے ہیں
منقبت مخدوم اشرف سمنانی
” حیاتِ مخدوم سِمناں “
غوثِ زماں ، مخدوم جہاں ، تاجدار ولایت ، امام العلماء ، رئیس القراء ، افتخار شعرا ، علامہ حافظ و قاری ، مفتی ، محدث ، مصنف ، مفسر و مترجم القرآن ، مخدوم سلطان سید اشرف جہانگیر سمنانی رحمة اللہ علیہ کی بارگاہ میں نذرانۂ عقیدت
بموقعہ عرس پاک ۲۸ محرم الحرام ، کچھوچھہ شریف یوپی
ولایت کے چمن کی تازگی مخدوم سمناں ہیں
دیارِ ہند میں فیضِ علی، مخدوم سمناں ہیں
اَبَد تک جس سے مہکیں گے، مہینے سال اور صدیاں
مدینے کے چمن کی وہ کلی مخدوم سمناں ہیں
لگا کر تخت کو ٹھوکر ، لباسِ فَقر اپنایا
دل مُسلم کو اک نورِ خودی مخدوم سمناں ہیں
جہانِ فکر و فن جس کی تجلی سے ہوا روشن
وہ مہتابِ علوم حیدری مخدوم سمناں ہیں
نسب میں ہیں مُنوّر آیتِ تطہیر کے تارے
نگاہ و روح کی پاکیزگی مخدوم سمناں ہیں
ہیں جبریلِ امیں بھی جن کے نانا جان کے خادم
کچھوچھہ میں وہی سِبطِ نبی مخدوم سمناں ہیں
بسے ہیں شخصیت میں سیرتِ صدیق کے جوہر
حیا میں عکس عثمان غنی مخدوم سمناں ہیں
نبی کے حسن کی تابش ہے ان کے خانوادے میں
کہ فرزند رسول ہاشمی مخدوم سمناں ہیں
فلک کی دونوں آنکھیں ان کے جلوے دیکھا کرتی ہیں
زمیں کیا ؟ مرجع افلاک بھی مخدوم سمناں ہیں
نہ چھوڑیں گے کبھی ان کی محبت کے سفینے کو
ہمیں تو مَظہَرِ “نوحِ نَجی” مخدوم سمناں ہیں
تجلی “نجمِ کبریٰ” سے انھوں نے علم کی پائ
تو شاگرد “امام یافعی” مخدوم سمناں ہیں
“عَلاءُ الحق” نے بخشے ہیں انھیں وہ گوہر حکمت
جبین فن کے نورِ سرمدی مخدوم سمناں ہیں
ملا ہے ان کو “یحییٰ مَنیَرِی” سے فیضِ روحانی
مکمل اک جہانِ آگہی مخدوم سمناں ہیں
مہارت ایسی تھی حضرت کو “تجوید و قِرَاءَت” میں
رئیسِ بزم قُرّاء آج بھی مخدوم سمناں ہیں
ہمیں صدقہ ملے “دیوانِ اشرف” کی فصاحت کا
وقارِ شعر ، تاجِ شاعری مخدوم سمناں ہیں
وہ علامہ وہ غوث وقت ، وہ مفتی، محدث بھی
گلِ علم و ہنر کی دلکشی مخدوم سمناں ہیں
شریعت اور طریقت دونوں میں وہ رہبر و ہادی
ضیاے ظاہری اور باطنی مخدوم سمناں ہیں
کتاب عشق و عرفاں کا سبق ، سبکو پڑھایا ہے
زمانے کو پیام آشتی مخدوم سمناں ہیں
اِسی سے ختم ہوں، اب اختلاف باہمی سارے
کہ حُبّ “چشتی رضوی اشرفی” مخدوم سمناں ہیں
وہ ذات پاک تو مجموعۂ جملہ سلاسل ہے
کبیری ، نقشبندی ، قادری مخدوم سمناں ہیں
نمایاں ہے جمال چشتیت اس روئے زیبا سے
یقینا مَظہَر ہند الولی مخدوم سمناں ہیں
ہےان کی زندگی کا لمحہ لمحہ ، اسقدر روشن
کتاب حق کی تحریر جلی مخدوم سمناں ہیں
نکھرتے جارہے ہیں سیرت و کردار کے جلوے
فنا میں بھی بقا کی روشنی مخدوم سمناں ہیں
عروج اشرفیت کو ، گھٹا سکتے نہیں حاسد
اُنھیں کہدو ، کہ وجہِ برتری مخدوم سمناں ہیں
پکارا جائے گا محشر میں ہم کو اشرفی کہہ کر
زہے قسمت امام اشرفی مخدوم سمناں ہیں
خزاؤں کا اثر اُن کے چمن پر ہو نہیں سکتا
گل و برگ و ثمر کی تازگی مخدوم سمناں ہیں
لگاؤں کیوں نہ پیشانی پہ اُس دہلیز کی مِٹی
نشانِ فخر ، ناز زندگی مخدوم سمناں ہیں
کبھی رکتی نہیں ان کے سحابِ فیض کی بارش
خدا کے فضل سے ایسے سخی مخدوم سمناں ہیں
کمالاتِ فریدی کیوں نہ چمکیں شعر کے اندر
کہ ذہن و فکر کی تابِندگی، مخدوم سمناں ہیں
سدا مخدوم اشرف کا
کریں گے ذکر اہل حق سدا مخدوم اشرف کا
کیا ہے رب نے اونچا مرتبہ مخدوم اشرف کا
فروغ حق کی خاطر سلطنت سمنان کی چھوڑی
ہے ذوق افزا نہایت واقعہ مخدوم اشرف کا
غذا ان کی تھی ذکرِ خالقِ کل عالمیں کرنا
نبی کا عشق تھا بس مشغلہ مخدوم اشرف کا
حقیقت کے سبھی رندوں کی خاطر نیر کی صورت
کچھوچھہ میں ہے جاری میکدہ مخدوم اشرف کا
منور ان کی ہستی ہے علاءُ الحق کے جلوؤں سے
ہے یحیی مَنیری سے رابطہ مخدوم اشرف کا
امین و وارثِ علم و کمال نجم کبری ہیں
ہے مقبول زماں ہر ضابطہ مخدوم اشرف کا
عزیمت پر عمل کرنا ہے ان کا شیوہ و طُرّہ
بلندی پر ہے زہد و اتقا مخدوم اشرف کا
درِ دولت پہ ان کے سر بہ خم ہیں قطبِ دوراں بھی
بہت پرفیض ہے شہرِ ولا مخدوم اشرف کا
جہاں والو عقیدت سے تم ان کا تھام لو دامن
بہت ہی معتبر ہے سلسلہ مخدوم اشرف کا
مشاہد شمع سے پروانے کو ہوتی ہے جو نسبت
اسی جیسا تعلق ہے مرا، مخدوم اشرف کا
اے اشرف زمانہ
منقبت درشانِ آفتاب ولایت ، غوثِ زماں ، حضرت سید شاہ مخدوم اشرف جہانگیر سمنانی علیہ الرحمہ کچھوچھہ مقدسہ یوپی انڈیا
======
تیرا نَسَب “حُسینی” ، سادات ہے گھرانہ
اے اشرفِ زمانہ
“حیدر” ہیں جَدّ امجد “شاہِ اُمم” ہیں نانا
اے اشرفِ زمانہ
ابدال در پہ آئیں ، اَوتاد سر جھکائیں
راہِ صفا کا رہبر، ولیوں نے تم کو مانا
اے اشرفِ زمانہ
ٹھوکر میں تختِ شاہی، تعمیرِ حق کے راہی
سَیَّاحِ بزم عالَم، فطرت مجاہدانہ
اے اشرف زمانہ
علم و ہنر کا جامہ ، تقویٰ کا ہے عمامہ
“لایَحزَنُوں” سے پایا، کردار غازیانہ
اے اشرفِ زمانہ
سِمناں کے شاہِ عالی ، روحانیت کے والی
مسکن ترا کچھوچھہ ، پَنڈوَہ ہے پیر خانہ
اے اشرفِ زمانہ
محبوبِ شاہِ جیلاں، “یحییٰ” کے دل کے ارماں
مخدومِ بزمِ عرفاں ، ہستی تری یگانہ
اے اشرفِ زمانہ
بھٹکے ہوؤں کی منزل، اے ڈوبتوں کے ساحل
ٹالو ہماری مشکل ، دکھ درد ہو روانہ
اے اشرفِ زمانہ
اے قبلہ گاہِ عالَم ، خلقِ خدا کے ہمدم
بزم جہاں میں دائم ، چمکے یہ آستانہ
اے اشرفِ زمانہ
ہر سٗو ہےظلم و سازش، ہے آپ سے گزارش
اعداے دیں پہ برسے ، عبرت کا تازیانہ
اے اشرفِ زمانہ
زندہ جگر عطا ہو ، خود دار سر عطا ہو
اونچی نظر عطا ہو ، اور دل بہادرانہ
اے اشرفِ زمانہ
علم و عمل کے خُوگر ، صبر و رضا کے پیکر
تم سے زمانہ سیکھے ، صحرا میں گل کھلانا
اے اشرفِ زمانہ
آواز جب لگائ ، امداد ہم نے پائ
شاہا تری گدائ ، عزت کا شامیانہ
اے اشرف زمانہ
ملت کے چاند تارے، شیدائ ہیں تمہارے
انوار کا حرم ہے ، تیرا یہ آشیانہ
اے اشرفِ زمانہ
پیدا ہو بھائ چارہ ، اُمت میں پھر دوبارہ
یکجائ کا ہو نعرہ ، مومن ہوں پھر توانا
اے اشرفِ زمانہ
گلزارِ اشرفیت ، اس کی بہار و رَنگت
دائم رہے سلامت ، یہ فیض کا خزانہ
اے اشرفِ زمانہ
دارین کا شَرَف ہے،عزت کا یہ شَغَف ہے
لکھتا رہے فریدی اَسلاف کا ترانہ
اے اشرفِ زمانہ
جہاں میں ہے بڑا شُہرہ ولایت ہو تو ایسی ہو
منقبت درشان حضرت مخدوم اشرف جہانگیر سمنانی کچھوچھوی رحمۃ اللہ علیہ
بموقع عرس مخدوم کچھوچھہ، 28,محرم /بمطابق 16، اگست 2023ء
۔۔۔۔۔۔۔۔۔۔۔۔
جہاں میں ہے بڑا شُہرہ ولایت ہو تو ایسی ہو
ملایا حق سے لاکھوں کو ہدایت ہو تو ایسی ہو
شہ سمنان تھے پہلے پھر ہوئے کونین کے سرور
ہدایت ہو تو ایسی ہونہایت ہو تو ایسی ہو
جہاں جس نے مدد چاہی و ہیں مشکل ہوئی آساں
غلاموں پر جو آقا کی عنایت ہوتو ایسی ہو
مریدوں کی قیامت میں رہائی نار دوزخ سے
کریں گے اشرف سمناں حمایت ہو تو ایسی ہو
تمہارے حُس٘ن کا قصہ کوئی عُشَّاق سے پوچھے
تڑپ جاتا ہے دل سن کر حکایت ہو تو ایسی ہو
شه سمناں کی مدحت سے نویدِ مغفرت پائی
سخن کی اشرفی خستہ غایت ہوتو ایسی ہو۔
(تحائف اشرفی ص151)
پیشکش:
ابوضیاءغلام رسول سعدی کٹیہاری مقیم بلگام کرناٹک
ولایت ہو توایسی ہو
